වගකිව යුත්තන් වහා නීතිය හමුවට ගෙන එන්නැයි එ .ජා .මා .හි කමිටුව රජයට දන්වයි
  
Share |   


       

2010 අගෝස්තු මස 13 වන දින රාත්‍රී 8.30 ට පමණ කිරිඳිවැල පොලිස් ස්ථානයට අනුයුක්තව සේවය කරනු ලබන පොලිස් නිලධාරීන් දෙදෙනෙකු විසින් අමරසිංහ ආරච්චිගේ ඩේවිඩ් අමරසිංහ නම් පුද්ගලයාව අත්අඩංගුවට ගන්නා ලදී. ඔහුව අත්අඩංගුවට ගන්නා අවස්ථාවේදී පොලිස් නිලධාරීන් විසින් එම පුද්ගලයාට යකඩ බට වලින් පහර දෙන ලදී. එම පහරදීම හේතුවෙන් ඩේවිඩ් අමරසිංහගේ සෞඛ්‍ය තත්ත්වය අයහපත් අතට පත් වූ අතර, ඒ හේතුවෙන් පොලිස් නිලධාරීන් විසින් ඔහුව රඳාවාන මූලික රෝහලට ඇතුලත් කරන ලදී. නමුත්, ඩේවිඩ් අමරසිංහ අසාධ්‍ය තත්ත්වයේ පසුවීම හේතුවෙන් ඔහුව ගම්පහ රෝහලට මාරු කර යැවූ අතර, පසුව ඔහුව ගම්පහ රෝහලෙන් කොළඹ ජාතික රෝහලට මාරු කර යවන ලදී. නමුත්, එම සියළු ප්‍රතිකාරයන් ව්‍යර්ථ කරමින්, 2010 අගෝස්තු මස 14 වන දින උදෑසන ඩේවිඩ් අමරසිංහ මෙලොවින් සමු ගන්නා ලදී.

අනතුරුව, කිරිඳිවැල පොලිස් ස්ථානය විසින් වැඩබලන මහේස්ත්‍රාත්වරයා වෙත වාර්තාවක් ඉදිරිපත් කළ අතර, ඩේවිඩ් අමරසිංහ අත්අඩංගුවට ගෙන පොලිස් ජීප් රථයෙන් ගමන් කරනවිට ධාවනය වන ජීප් රථයෙන් පිටතට පැනීම මත ඇති වූ තුවාල හේතුවෙන් ඔහු ජීවිතක්ෂයට පත් වූ බවට එම වාර්තාව මගින් සඳහන් කර තිබුණි. තවද, බීමතින් රිය ධාවනය කිරීම හේතුවෙන් ඔහුව අත්අඩංගුවට ගත් බවට එම වාර්තාවෙහි සටහන්ව තිබුණි. අනතුරුව, වැඩබලන මහේස්ත්‍රාත්වරයා විසින් දේහය පිළිබඳව පශ්චාත් මරණ පරීක්ෂණයක් සිදු කිරීමට නියෝග කරන ලදී. පහරදීමක් හේතුවෙන් ඩේවිඩ් අමරසිංහගේ මරණය සිදු වූ බවටද, අත් අඩංගුවට ගන්නා විට ඔහුගේ ශරීරයේ මත්පැන් අඩංගුව නොතිබූ බවටද පශ්චාත් මරණ පරීක්ෂණ වාර්තාවේ සඳහන් විය.

ඒ අනුව, සැකකාර පොලිස් නිලධාරීන් දෙදෙනා අත්අඩංගුවට ගෙන අධිකරණයට ඉදිරිපත් කරන ලද අතර, ඔවුන් දෙදෙනාව රිමාන්ඩ් බන්ධනාගාර ගත කරන ලෙසට පූගොඩ මහේස්ත්‍රාත්වරයා විසින් නියෝග කරන ලදී. නමුත්, ඩේවිඩ් අමරසිංහගේ මරණය හා සම්බන්ධව මහේස්ත්‍රාත් අධිකරණයේ ලඝු නොවන නඩු කටයුතු පැවැත්වීමටත් ප්‍රථමයෙන් සැකකාර පොලිස් නිලධාරීන්ට එරෙහිව මරණයට අදාළව ඉදිරියට අපරාධමය නඩු කටයුතු පවත්වාගෙන යාමට අදහස් නොකරන බවට නීතිපතිවරයා වෙනුවෙන් සොලිසිටර් ජනරාල්වරයා විසින් මහේස්ත්‍රාත් අධිකරණය වෙත දන්වා සිටින ලදී. නමුත්, මහේස්ත්‍රාත්වරයා ඊට විරුද්ධ වූ අතර, පරීක්ෂණ කටයුතු ඉදිරියට පවත්වාගෙන යන ලෙසට නියෝග කරන ලදී. සැකකරුවන්ට ඇප ලබා දීම ප්‍රතික්ෂේප කරන ලදී. මීට එරෙහිව සැකකරුවන් විසින් අභියාචනාධිකරණ ඉදිරියේ රිට් ආඥාවක් අයැදුම් කළ අතර, එම නඩුව මේ වනවිටත් විභාග වෙමින් පවතී.

 

මෙම සිදුවීම පිළිබඳව රයිට් ටු ලයිෆ් මානව හිමිකම් මධ්‍යස්ථානයට තොරතුරු ලැබුණ අතර, ඒ අනුව අප සංවිධානයේ නියෝජිතයින් කිහිපදෙනෙකු සයිමන් අමරසිංහව සොයා ඔහුගේ නිවස බලා පිටත්ව යන ලදී. පසුව, මෙම සිදුවීම හා සම්බන්ධව සයිමන් අමරසිංහ වෙත රයිට් ටු ලයිෆ් මානව හිමිකම් මධ්‍යස්ථානය විසින් අවශ්‍ය නීති උපදෙස් ලබා දුණි.

 

මේ අනුව, පොලිස් නිලධාරීන් විසින් සිදු කරන ලද කෲර, අමානුෂික වධහිංසාවන් සහ අත්තනෝමතික රඳවා තබා ගැනීම හේතුවෙන් වින්දිතයා මියයාම පිළිබඳව විධිමත් විමර්ශනයක් හෝ නඩු කටයුතු පවත්වා ගෙන යාමට ශ්‍රී ලංකා රජය අසමත් වීම හේතුවෙන් මෙම සිදුවීම පිළිබඳව 2012 සැප්තැම්බර් මස 27 වන දින ඩේවිඩ් අමරසිංහගේ සහෝදරයා වූ සයිමන් අමරසිංහ විසින් රයිට් ටු ලයිෆ් මානව හිමිකම් මධ්‍යස්ථානයේ මැදිහත් වීම මත, ආසියානු මානව හිමිකම් කොමිසමේ අධ්‍යක්ෂක නීතීඥ බැසිල් ප්‍රනාන්දු මහතාගේ උපදෙස් පරිදි සිවිල් සහ දේශපාලන අයිතිවාසිකම් පිළිබඳ අන්තර්ජාතික සම්මුතියෙහි වෛකල්පිත ප්‍රොටෝකෝලයට අනුව (Optional Protocol to the International Covenant on Civil and Political Rights) එක්සත් ජාතීන්ගේ මානව හිමිකම් කමිටුව (United Nations Human Rights Committee) වෙත තනි පුද්ගල සන්නිවේදනයක් (Individual Communication) ඉදිරිපත් කරන ලදී.

 

ශ්‍රී ලංකාව, 1980 ජුනි මස 11 වන දින සිවිල් සහ දේශපාලන අයිතිවාසිකම් පිළිබඳ අන්තර්ජාතික සම්මුතිය (International Covenant on Civil and Political Rights) අපරානුමත කළ අතර, 1980 සැප්තැම්බර් මස 11 වන දින එය බලාත්මක කරන ලදී. ඒ අනුව, එම සම්මුතිය යටතේ එහි සඳහන් වූ අයිතිවාසිකම් සුරක්ෂිත කිරීමට ශ්‍රී ලංකා රජය බැඳී සිටී. නමුත්, රාජ්‍ය පාර්ශව විසින් එම සම්මුතියෙහි අඩංගු වන අයිතිවාසිකම් උල්ලංඝන කළවිට ඊට එරෙහිව අයිතිවාසිකම් කඩ වූ පුද්ගලයාට ඒ හා සම්බන්ධව එක්සත් ජාතීන්ගේ මානව හිමිකම් කමිටුව වෙත තනි පුද්ගල සන්නිවේදනයක් ඉදිරිපත් කළ හැක. ඊට අවස්ථාව සැලසී ඇත්තේ සිවිල් සහ දේශපාලන අයිතිවාසිකම් පිළිබඳ අන්තර්ජාතික සම්මුතියෙහි වෛකල්පිත ප්‍රොටෝකෝලයට අනුවය. 1998 ජනවාරි මස 03 වන දින ශ්‍රී ලංකාව වෛකල්පිත ප්‍රොටෝකෝලය බලාත්මක කරන ලදී.

 

ඩේවිඩ් අමරසිංහගේ මරණයට අදාළව සිවිල් සහ දේශපාලන අයිතිවාසිකම් පිළිබඳ අන්තර්ජාතික සම්මුතියෙහි 6 වන වගන්තිය යටතේ, ජීවිතය කෙරෙහි ඇති නෛසර්ගික අයිතිය, 7 වන වගන්තිය යටතේ, වධහිංසාවකට හෝ කෲර, අමානුෂික හෝ පහත් සැළකීමකට හෝ දඬුවමකට භාජනය නොකිරීමේ අයිතිවාසිකම සහ 9 වන වගන්තිය යටතේ, පුද්ගල නිදහසට හා සුරක්ෂිතභාවයට ඇති අයිතිවාසිකම යනාදී අයිතිවාසිකම් රාජ්‍ය පාර්ශවය විසින් උල්ලංඝනය කළ බවට සයිමන් අමරසිංහ තම තනි පුද්ගල සන්නිවේදනය මගින් දක්වා තිබුණි. තවද, සම්මුතිය යටතේ, 2 (3) වගන්තිය අනුව, සම්මුතියෙහි දැක්වෙන අයිතිවාසිකම් රාජකාරි තත්ත්වයෙන් කටයුතු කරන පුද්ගලයන් විසින් කඩ කරනු ලැබුවේ වුවද ඒ නොතකා ඒ සම්බන්ධයෙන් කාර්ය සාධක ප්‍රතිකර්ම යොදනු ලබන බවට වගබලා ගැනීම, එම අයිතිවාසිකම් කඩවීම පිළිබඳව ප්‍රතිකර්ම ඉල්ලා සිටින කවර පුද්ගලයෙකුටද වුවද නිසි අධිකරණ, පරිපාලන හෝ ව්‍යවස්ථාපිත බලධාරීන් විසින් හෝ රාජ්‍යයේ නිසි ක්‍රමය අනුව විධිවිධාන සැලසී තිබෙන පරිදි එම පුද්ගලයා සතු අයිතිවාසිකම් ලැබෙන බවට වගබලා ගැනීම හා අධිකරණ ප්‍රතිකර්ම සැලසෙන ආකාරයෙහි කටයුතු වර්ධනය කිරීම සහ එබඳු ප්‍රතිකර්ම ප්‍රදානය කරනු ලැබූ විට නිසි බලධාරීන් විසින් ඒවා ක්‍රියාවෙහි යොදවන බවට වග බලා ගැනීම රාජ්‍ය පාර්ශවෙහි වගකීම වන බවද, එය රාජ්‍ය පාර්ශවය විසින් උල්ලංඝන කර ඇති බවද, සයිමන් අමරසිංහ තම තනි පුද්ගල සන්නිවේදනය මගින් දක්වා තිබුණි. 

 

අංක. 2209/2012 දරණ මෙම තනි පුද්ගල සන්නිවේදනය පිළිබඳව 2017 ජූලි මස 13 වන දින එක්සත් ජාතීන්ගේ මානව හිමිකම් කමිටුව විසින් තම නිරීක්ෂණයන් ලබා දෙන ලදී. එම නිරීක්ෂණයන්ට අනුව, සම්මුතිය යටතේ ඉහතින් දැක්වූ අයිතිවාසිකම් රාජ්‍ය පාර්ශවය විසින් උල්ලංඝනය කර ඇති බවට මානව හිමිකම් කමිටුව විසින් දක්වා ඇත. තවද, ඩේවිඩ් අමරසිංහගේ මරණය හා සම්බන්ධව සාධාරණ සහ අපක්ෂපාතී පරීක්ෂණයක් පවත්වා ඒ සම්බන්ධව සාධාරණය ඉටු කරන ලෙසටද, මෙම මරණයට වගකිවයුතු පාර්ශවයන් නීතිය හමුවට ගෙන ඒමෙන් ඔවුන්ට දඬුවම් ලබා දෙන ලෙසටද, වින්දිතයන්ගේ පාර්ශවයට වන්දි ලබා දෙන ලෙසටද, ඉදිරියට මෙවැනි සිදුවීම් නැවත සිදුවීමට ඉඩ නොදීමට වගබලා ගන්නා ලෙසටද එක්සත් ජාතීන්ගේ මානව හිමිකම් කමිටුව විසින් ශ්‍රී ලංකාව රජය වෙත දන්වා ඇත. කමිටුවේ නිරීක්ෂණයන් හා සම්බන්ධව රාජ්‍ය පාර්ශවය විසින් ගන්නා ලද පියවරයන් පිළිබඳව දින 180 ක් ඇතුලත රාජ්‍ය පාර්ශවය විසින් මානව හිමිකම් කමිටුව දැනුවත් කරනු ඇතැයි මානව හිමිකම් කමිටුව අපේක්ෂා කරන බවට එම නීරීක්ෂණ වාර්තාව මගින් දක්වා ඇත.

 



Posted Date :

2017-08-22